امين حزب «مصرالقوية» بالمرج فى حوار مع «المرج القاهرة» يجيب على اسئلة زوار الموقع

موقع المرج القاهرة ( news.elmarg.net )

ماتقيمك لنتائج تظاهرات 30 يونيو , اللى بتطالب بسحب الثقة من الرئيس ؟
يوم 30 ستة اللى دعى ليه حركة تمرد وهى حركة شعبية , من حق اى حد فى البلد دى يعبر عن رأيه طلاما انه بطريقة سلمية بدون اى تجاوز او عنف , احنا كاحزب
مصرالقوية نزلين عيزين نقول ان فى مادة فى الدستور (مادة 150) بتقول ان من حق الرئيس محمد مرسى يدعوا لأستفتاء على انتخابات رئاسية مبكرة , لو الشعب وافق على اجراء الانتخابات المبكرة فى الحالة دى يبقى الشعب بيقول للرئيس مش عايزينك وشكراً , موفقش على اجراء انتخابات يبقى الرئيس يكمل فترته الرئاسية , ودى آلية ديمقراطية فى أعتى الديمقراطيات مش بدعة , لأن دلوقتى المعارضة بتدعى انها بتملك الشارع والحزب الحاكم بيدعى انه بيملك الشارع , ايه الفيصل بنا .. الشعب .. يبقى بنحتكم ليه فى الاخر , لكن فى نقطة تانية وهى ان الناس نزلين يوم 30 ستة جايبين من الاخر , وانا رأى الشخصى ان مطالبنا المفروض تبقى تصاعدية شوية , انا شايف الصراع دلوقتى على الساحة مش صراع ديمقراطى , هو صراع وجود , كل تيار من ناحية رافض وجود التانى , وده مينفعش , وشايف ان الثوار الحقيقين الناس المحترمه اللى بتنادى بحرية وديمقراطية اللى بتنادى بمبادئ ثورة 25 يناير , الفلول والبلطجية والنظام القديم بتاع مبارك جاى بيستخدمه وعايز يقودهم للرجوع للحكم تانى فلازم نكون فطنين لنقطة دى , ولكن اخيراً دى حركة سلمية حركة شعبية كل واحد حر يعبر عن رأيه بالطريقة السلمية زى ما هو عايز , احنا مع الحرية بصفة مطلقه مادام انه لايستخدم عنف ولايتعرض لحرية الاخرين , وانا رؤيتى الشخصية ان يوم 30 سته انا بحسبه ممكن يبقى يوم كارثى فى السياسة المصرية , بمعنى ان الاخوان مش بسهولة هيفرطو فى ان رئيسهم يتخلع زى مبارك , لأن كل الدعوات ان 30 سته نهاية حكم الاخوان ورحيل مرسى , فالاخوان عندهم قناعة انهم ممكن يموتو قدام بقاء الرئيس بتعهم ويستشهدو ويدخلو الجنة , فاهو يوم كارثى لوبقى فى احداث عنف والجيش هينزل يكنس ده كل ومحدش هيقدر يقوله سيب الحكم ولا يسقط حكم العسكر زى مكنا بنقول لأن هيقلنا انا ادتكو الحكم وعملنا انتخابات ديمقراطية وانتو مردتوش , معرفتوش تتعايشو مع بعض يبقى خلاص انا هرجع النظام القديم بتاع 52 , على الناحية التانية لو الحشد ضعيف يوم 30 ستة , هتبقى رسالة مباشرة لمحمد مرسى ان الشعب معاك , ما لو كان ضدك كان نزل , يبقى هيكمل بينا محمد مرسى و يلبس بينا فى الحيط اكتر , بنفس السياسات الفاشلة بنفس الاجرات بتاعته الفاشلة ومحدش هيعرف يكلمه , فانا بالنسبالى اليوم ده سياسياً هيبقى يوم صعب فى تاريخ مصر

ايه تقيمك لأداء الرئيس فى الازمة اللى بتعشها مصر حالياً ؟
هو اداء الرئيس لو هحكم عليه دلوقتى كان فى فرص كتيره اوتيحت لدكتور محمد مرسى بعد انتخابه رئيس جمهورية ان هو يلم الشمل ولكن مره مع مره بيضيع الفرصه , لأن مبيسمعش ومبيشركش , من اول مابدء يشكل الفريق المعاون بتاعه فى رئاسة الجمهورية بدء يجيب مستشارين , واحد منهم طلع قال تعليق "انا مبحبش اكون وردة فى عروة الجاكتة" فبالتالى مكنش فى اى دور للمستشارين اللى جانبه , جيبهم ديكو وبس , فبالتالى الدكتور محمد مرسى يوم بعد يوم بيقدم فشله دى نقطة , تانى حاجه بيضيع فرصة كبيره اوى على لم الشمل , و أحد اسباب الاستقطاب اللى احنا فيه دلوقتى هى المعارضة لأنها رفضة وجود الاخوان جملة وتفصيلا والجزء الاكبر من سبب الاستقطاب ده بحمله لدكتور محمد مرسى لأن هو الرئيس .

تقيمك لأداء رئيس الوزراء وحكومته ؟
ده بقى مطلب شعبى الرئيس مش عايز يستجيب ليه , الناس كله بتقول للرئيس غير الحكومة غير الحكومة , بيفكرنى بأيام المخلوع كل الناس كانت بتقول قيل نظيف , نبص نلقيه بيقول تم تكليف احمد نظيف بتشكيل حكومة , فالمطالب دى مطالب بسيطة وسهله جداً ولا تقلل من قيمتك كارئيس جمهورية ولكن هى هتدى فرصة لأعادة البناء , وتشكيل حكومة ممثلة من كافة التيارات ,وممثلة من كافة التيارات عشان اللى بره الحكم مش شايف المشاكل اللى فيها مصر , فلما يكون فى مندوب من كل تيار موجود فى وزارة هيشوف البلد فها ايه , لما كلنا نشوف المشكلة , هطلع اتكلم لو انا بنتمى لتيار معارض وقول فى مشكلة كبيره مصر بتعشها والرئيس مرسى بيحاول يجتهد واحنا بنجتهد وبنقدمله الحلول ولو الرئيس مرسى محسس المعارضة او اى حد بيقدمله اى تعاون بقيمه اكيد الناس مش هتحبط ولكن احنا كل الحجات اللى بنقدمها بيضرب بيها عرض الحائط , والحكومة الحالية لاتصلح اطلاقاً

هل ستترشحون لأنتخابات مجلس الشعب القادمة بدائرة المرج ؟
بالتأكيد , احنا شغلين عل كده من فتره

هل ستعقدون تحالفاً مع احزاب اخرى اومع مستقلين ؟
اكيد بيبقى فى تحالفات بس احنا عندنا مبادئ الحزب أرساها , ان احنا حتى لو مش هننزل فى دائره معينها , وفى اسم محترم وشخصية فاضله صالحة للوطن حتى لو مبينتميش لحزبنا هندعهم , والحزب واضح فى النقطة دى جداً ممكن ننكر ذاتنا ونقدم مصلحة الوطن , بالنسبة للتحالف مع الاحزب دى منظومة بتترسم ويتحطلها معايير معينه , والحزب دائما بيقدم المصلحة العامة للبلد لو احنا شيفين اى تيار فى كادر محترم فى دائره انتخابية معينه هيقدر يفيد واحنا منمتلكش هذه القدره اكيد احنا بندعمه وممكن نتحالف معاه وننزل نشتغله مفيش مشاكل خالص , ولكن حتى الان لم يتم اى تحالف مع اى حزب .

متى سيتم اعلان مرشحى الحزب عن دائرة المرج ؟
لما يجى قانون مجلس الشعب , قانون مجلس الشعب من الدستورية لمجلس الشورى لدستورية , ولسه منعرفش الدوائر الانتخابية هتثبت على كده ولاهتتغير , ولسه القانون حتى مصدرش

هل تتوقع حصول حزب مصرالقوية على نسبة مؤثرة فى الانتخابات القادمة ؟
لازم نشوف حاجه مهمه اوى , لما تكون عارف حجمك وتتعامل عليه احسن ماتبنى قصور من الرمال , احنا حزب لسه عمرنا كام شهر بنراهن على التيار المعتدل اللى مش مستقطب لاشمال ولايمين اللى هو التيار الرئيسى , والتيار الرئيسئ المصرى هو تيار وسطى , تيار غير مائل للعنف , بيحب يغير بطرق سلمية احنا بنراهن على التيار ده , وفى نفس الوقت احنا لسه بنبنى حزبنا , عندنا تحديان جمدين كان فى انتخابات مجلس شعب وبتتأجل وده كان من مصلحتنا لأن كنا لسه بنبنى الامانات بتاعت الحزب وكوادره ولجانه فادتنا فرصة ان احنا نبنى الحزب وحده وحده , احنا حزب عمرنا كام شهر لسه مكملناش سنة لكن عندنا طموح؟ اه طبعاً فى طموح بس هنقول هناخد اكثرية يبقى بنهرج طبعاَ , كلام غير واقعى بالمره , ومنقدرش لسه نحدد نسبة معينة من المقاعد بالمجلس لسبب بسيط انا لسه المنظومة عندى مكتملتش , ويوم عن يوم انا بنمو وبكسب ارض جديدة الحمد لله رب العالمين فاممكن احدد نسبة معينه على نتيجت الانتخابات تطلع اكتر اقل , المواقف السياسية هى اللى بتسوق اسمك فى الشارع عند الناخب .

ما الذى يضيفه حزب مصر القوية للحياة السياسية ؟
انا شايف من وجهة نظرى ان حزب مصرالقوية هو انسب حزب موجود فى الساحة السياسية المصرية دلوقتى , المشهد العام من الاستقطاب اقصى اليمين واقصى اليسار فى الشارع السياسى المصرى ده مشهد كارثى , لأن مع نغمة المعارضة من هنا ومن هنا ورفض كل تيار للأخر مساحة الفجوة الكبيره اللى بينهم بتتسع وده كله مش فى مصلحة مصر , انا شايف ان حزب مصر القوية هو الحزب الوحيد القادر على لم شمل المعارضة والحزب الحاكم , والاضافة ان احنا حزب وسطى حزب مبيمنعش حد من الانضمام ليه , روأيتنا الاعتدالية اللى هى فى النص عايزين نجمع الشعب كله حولينا .

كيف ترى وضع المرأة المستقبلى فى مصر ؟
احنا فى امانة المرج بنفتقض العنصر النسائى ,والعدد الموجود بيشكل نسبة ضعيفة جداً من العدد الكلى للأعضاء , واحنا شيفين ان الفتره اللى احنا عيشنها دلوقتى فترة تطور فكرى جامد , محتاجين ننمى افكار المرأة ورؤيتها ومساهمتها فى المجتمع , متبقاش تابع , تبقى مبدعة ومفكره تبقى صاحبة اقتراحات وحلول وده المربع اللى بنحاول نضع المراة فيه عندنا فى الحزب , انها تمسك لجان وتبدع فى ادارتها , واحنا فى حزب مصر القوية شيفين المراة هيبقى ليها دور مؤثر جداً فى الحياة السياسية المصرية .

كيف ستواجهون التيارات الدينية فى الانتخابات القادمة ؟
احنا اول ناس اعترضنا على قانون الشعارات الدينية , لأن مينفعش انها تستخدم فى الانتخابات , واحنا بنراهن على الشغل فى الشارع , اذا كانت التيارت الدينية بتشتغل على العاطفه فأحنا فى حزب مصر القوية بنشتغل على العقل , لازم نخاطب عقل الناخب بنقنعه وبنقله رويتنا وبقدر الامكان بنحاول نوصل مفهومنا لعقله مش لعاطفته , لأن احنا شبعنا من دغدغة العواطف الدينية , فبالتالى الناخب ابتدى ياخد باله من ده .

مامدى امكانية التعايش مع بين تيار الاسلام السياسى والتيار المدنى ؟
مفيش حاجه اسمها امكانية , ده لازم نتعايش معاهم , لازم نتعايش مع جميع التيارات , احنا لينا مربع خاص بينا , والمربع ده لايقصى اى احد , انته مصرى اذاً ليك مساحة من الوجود فى المشهد , ولازم نشوف الاول احنا متفقين فى ايه ونبنى عليه قبل مانشوف احنا مختلفين في ايه , واكيد الاختلافات دى هتقل مع الوقت , ولا ينبغى لأى تيار موجود فى مصر ان هو يقصى تيار اخر وياخد البلد لوحده , البلد دى بلد كل المصريين ولابد ان يمثل كل المصريين فى المشهد السياسى .

ماموقف حزب مصر القوية من تطبيق الشريعة الاسلامية ؟
احنا اتكلمنا فى النقطة دى كتير , انا أدين بالاسلام اذاً عندما أدين بدين يجب ان ارتضى شرع الله فيه , نقطة ومن اول السطر , احنا عندنا تحفظ من كتر تكرار كلمة الشريعة , الناس سخفوا قيمة وعظمة هذه الكلمة , على المستوى القانونى والدستورى نبص فى دستور مصر الجديد والقديم المادة التانية بتقول ان القوانين كلها بتؤخذ من مبادئ الشريعة الاسلامية .

هل تتوقع ان يحصل حزب الحرية والعدالة على نفس الاصوات التى حازها فى الانتخابات الماضية ؟
بالتأكيد لأ , فى ظل الفشل اللى احنا شيفينه فى ادارة الدولة انا شايف ان اسهم الحرية والعدالة بتقل , وان كان هما مش معتقدين هذا لكن ان شاء الله فى الانتخابات اللى جاية هيشفوا ده عملى , لو عملو تحالف فى الانتخابات الجاية مش هياخد اكتر من 25% او 30% على اقصى تقدير , ولازم نعترف ان حزب الحرية والعدالة من اكتر الاحزاب تنظيماً , وعنده خبره فى ادارة العملية الانتخابية عن الاحزاب التانية اللى موجوده , عندهم الكوادر اللى بتقف قدام اللجان توجه الناخبين , عندهم الكواد اللى بتنزل تقدم خدمات لناس فى اوقات معينة , فهما عندهم خبرات انتخابية وليس مصداقية فى ادارة الدولة .

* اسئلة زوار الموقع *

حمادة بركة : هتنزلو مجلس الشعب اللى جى ولا مش هتنزلو ؟ وهل هتدفعو بحد من اهالى المرج ولا لأ ؟
تمت الاجابة

دينا الكاشف : ايه رأى سيادة النائب على حملة تمرد وياترى هتشترك وتنزل ولا لأ , انا عرفت ان الحزب وافق على النزول لأنتخابات رئاسية جديدة , موقف حضرتك ايه ؟
حركة تمرد هى اجتهاد شعبى اهلاً وسهلاً بيه , موقفى الشخصى من تمرد انا ممضتش على استمارة تمرد , ورافض النزول مع تمرد , لأن ليه رؤية تانية غير اللى هما شيفينها , هم شيفين يوم 30 ستة اخر حكم الاخوان ونهاية حكم محمد مرسى انا بحترم رأيهم جداً بس انا ليه رأى تانى خالص وهو لو انا عايز اسوق مطالبى مبدأش من الاخر انا ببداء بمطالب محدده , وابدء اعمل اعتصامات فى الميادين واثبت عليها لو متنفزتش سقف المطالب بيعلى وحده وحده لأن انا بحاول اكسب راجل الشارع اللى قاعد فى البيت اللى هينزل ينتخبنى بكسب تعاطف الشعب اللى مش نازل , فلازم ابين لناس اننا مش داعى للعنف ومديش فرصة لبلطجية وفلول انه يخترقنى , مديش فرصه لواحد ايديه ملوثه بدم واموال مصريين ان كتفه يبقى بكتفى , حركة تمرد زى مافيها ناس ثوريين بحترمهم جداً وبقدرهم فيها فلول كتير فيها ناس دخله عايزه تطلع على اكتاف الثوار وترجع للحكم تانى والنظام القديم , ده موجود ومحدش يقدر ينكره خالص , وانا مش هنزل يوم 30 ومش معنى كده ان انا بأيد محمد مرسى والاخوان , محمد مرسى يدير البلد اداره فاشلة , وقرار حزب مصر القوية بالمشاركة جاء نتيجة تصوت اغلبية الاعضاء بالمشاركة فى النزول بعد المناقشة , فاقرارات الحزب مبتنزلش من فوق لتحت , قرارات الحزب بتتطلع من تحت لفوق , واحنا فى امانة المرج بنحترم الالتزام الحزبى لكن فى نفس الوقت فى حرية شخصية ورؤية شخصية , اذا تعارضت رؤيتك الشخصية مع قرارات الحزب مينفعش تتجر وراى حزب مينفعش تلغى شخصيتك , اكيد فى قرارات مش هتوافق رؤيتك وفى قرارات هتوافق رؤيتك , وان شايف ان قرار الحزب بالمشاركة غير موفق لأن اصحاب الدعوة الرئيسين والاساسيين ليوم 30 ستة بيقولو احنا نزلين لأنهاء حكم محمد مرسى وخلعه زى نظام مبارك احنا نزلين برؤيه تانية وهى مطالبة الرئيس بأستخدام المادة 150 وعمل استفتاء على اجراء انتخابات رائاسية مبكره , هل احنا صوتنا عالى نقدر نسوق المطالب دى ولا لأ ؟ هل احنا لما ننزل فى اليوم ده تحت العنوان العريض هنتحسب على ان احنا ضمن دول بنوافق على المطالب دى ولا لينا مطالب تانية , ومخالفة قرار الحزب لاتعنى عدم احترام الالتزام الحزبى لكن مينفعش تلغى عقلك , مينفعش تلغى قناعتك , لو لغينا عقلنا وقناعتنا مش هنختلف عن اى حد احنا بننتقده , ان انزل .. بينزل , خليك فى البيت .. بيفضل فى البيت , لو احنا عملنا كده يبقى ملناش حق ننتقد اى حد , ودى كلها اجتهادات سياسية محدش بيمتلك الحقيقة المطلقه .
وفى حالة اجراء انتخابات رئاسية جديده الحزب هيرشح حد , واحنا بنجهز كوادر من الشباب .

احمد : اين دور حزبكم فى بالمرج لم نرى لكم اى تواجد فعال على ارض الواقع ؟
احنا مقصرين فى حجم الفعاليات اللى بنعملها فى المرج بكل وضوح وكل صراحة , لأن احنا اول مبدأنا دخلنا على موسم امتحانات ومعظم الاعضاء طلبه فأحنا موقفين النشاط من شهرين , لكن ان شاء الله بعد انتهاء الامتحانات هيشوف لينا تواجد دائم فى الشارع

محمد المرجاوى : هناك مشاكل داخل امانتك وصراع داخلى بين حبلص المفروض يكون امين المرج وانت عملت انقلاب ضده بطريقة .... واستوليت على امانة المرج , لماذا لاتقوم بمصالحة داخلية بالأمانة ؟
اولاً لازم نتحفظ على اللفظ اللى استاذ محمد قاله لكن له مطلق الحرية يقول اللى هو عايزه , لما نيجى نتكلم عن مسألة انقلاب , مفهوم الانقلاب لازم يكون عارفه الاول ان بيبقى فى قائد لتنظيم معين او لأمانة معينه او لحزب معين ويجى حد يشيلة ويجى مكانه فالاستاذ محمد حبلص كان مسؤل الحملة الرئاسية لدكتور ابوالفتوح بالمرج وله جهد مشكور ولكنه غير موجود فى الحزب فكيف اجريت انقلاب عليه , وانا اول أمين منتخب لأمانة المرج .

غيرمعرف : هل انتم مشاركون فى حملة تمرد بالمرج ؟
فى اعضاء بأمانة المرج مشاركين فى الحملة بشكل شخصى , وحملة تمرد فى الاصل هى حملة شعبية ونحن لانمنع اعضاء الحزب عن المشاركة فى اى حملة شعبية , وده من مبادئ حزب مصر القوية .

بسنت : هل كان ليكم دور كأمانة فى مشكلة قصر نعمة واذا كان ليكم دور ممكن نعرفه ؟
احنا بنتواصل مع المسؤلين عن الملف ده ومشاركين فى كل الفعاليات اللى هما دعو ليها من الاول اذا كانت تظاهره امام محافظة القاهرة او امام مجلس الوزراء او امام وزارة الاستثمار , لكن لازم نبص لنقطة مهمة جداً العمل هنا عمل خدمى للمرج كلها فكان فى انكار ذات بكل المقاييس وكان المشاركة ضمن اهالى المرج مش كأعضاء بحزب مصر القوية , احنا بنخدم مجتمعنا وديرتنا ومش عايزين نستغل ده حزبياً , احنا بننتقد الاخرين بسبب الافعال دى , ازاى ننتقد فعل ونأتى بمثله , فأحنا مشركين مع الحاج محسن بربرى والاستاذ ابراهيم بدر والحاج احمد والحاج شعبان الناس اللى ماسكه الملف ده ومتواجدين معاهم فى كل الفعليات .

احمد : هل لدى حزبكم ايدلوجية محدده وواضحة ؟
بالتأكيد , حزب مصر القوية هو حزب وسطى بكل المقاييس , بننتهج الوسطية الاسلامية وعلى المستوى الاقتصادى , بندى حرية لرأس المال يشتغل لكن مع المحافظه على العدالة الاجتماعية , وحقوق الفقراء والمهمشين بننحاز ليها .

محمد خلف : لماذا لاتتنازل عن منصبك بعد كثرة الخلافات بينك وبين الاعضاء حتى اكثر من فريق داخل الامانة ؟
انا حابب بس يجى يقولى فين الفرق اللى فى الامانة , وانا مرشحتش نفسى للمنصب ده الاخوة هنا فى الامانة هما اللى طالبونى بالترشح , وفى الانتخابات تنازل المرشح الاخر لصالحى بناءًعلى اختيار اغلب الاعضاء ليه , وامانة المرج امانة متماسكة كل اعضائها على مستوى المسؤليه , فيهم انكار ذات ولاينتظرون اى مقابل .

محمد محمود : ماموقف حزب مصر القوية - امانة المرج من تظاهرات 30يونيو , وهل اذا سيتم النزول من قبل حزبكم هيكون فى دور للحزب فى مناطق المرج وعزبة النخل على ارض الواقع , بمعنى انكم هتعملو مسيرات من المناطق دى ؟
انا مش هيبقى ليه دور رسمى كامانة المرج فى 30 ستة , الية اتخاذ القرار عندنا فى الامانة هى الديمقراطية التشاركية , كل الاعضاء شاركو فى اتخاذ القرار ونسبة 80% من الاعضاء رفضت المشاركة و20% مشاركين بشكل شخصى .

محمدالتركى : 1- حضرتك مازلت ترى ان قرار انشاء حزب مصر القوية كان قرار صحيح ؟
بالتأكيد
2- كيف تفسر اختلاف (ممكن نسمية تخبط) بين اعضاء الحزب وقياداته حول عدد من القرارت جعلت العديد من اعضاء الحزب يستقيلون ؟لماذا لايكون هناك تنسيق واستماع لوجهات النظر بينكم كاعضاء بالحزب ؟
اى حزب فى الدنيا لما يجى ياخد قرار , صعب انه يرضى كل الاطراف , فبالتالى لما اخد قرار ممكن يجى مخالف لرأى حد او مش متوافق معاه , مع الوقت لما انحيازات الحزب تظهر اكتر كل الاعضاء هيعرفو ان القرارات اللى بتتاخد قرارات على مسطرت الحزب حسب انحيازاته , والانحيازات دى هي العقد المكتوب بين الاعضاء .
3- بناءا على السؤال السابق كيف ترى اتخاذ قرار المشاركة فى 30 يونيو رغم ان حضرتك من الناس المعترضة على حملة تمرد ؟ هل الحزب لم يستمع الى رايكم كامين لامانة المرج والى راى معارضى النزول؟
انا جوبت على النقطة دى وقلت الية اتخاذ القرار فى الحزب .
4- ما حقيقة الخلاف بينكم وبين محمد رشدى حبلص ؟ واذا كان هناك خلاف فلماذا لا تقوم بحله ؟
انا جوبت على السؤال ده ومفيش اى خلاف بينى وبين استاذ محمد حبلص على المستوى الشخصى وهو ليس عضواً فى حزب مصر القوية .
5- ممكن تقولنا الاشياء الملموسه اللى عملتها الامانة فى المرج؟
زى ماقولتك احنا بدأنا فى شهر 3 , واى حزب وليد فى اى مكان رقم واحد بيبداء يشتغل على تعريف الناس بوجوده رقم 2 لو فى اى مشروع يخدم المنطقه بيشارك فيه , وانا قلت حجات زى كده بس مش لازم نتاجر بيها سياسياً لأن احنا بنفصل عندنا بين العمل الخيرى والعمل السياسي وعايزين نرسخ المفهوم ده , مش عشان انا بشتغل سياسية يبقى لازم اقدم خدمة لناس , فى دور للجمعيات الاهلية بتقوم بيه فاحنا لوقمنا كاحزب بالدور ده لازم ننكر ذاتنا وننكر نفسنا , لكن على مستوى الامانة احنا مقدمين مشاريع محترمه لأمانة القاهرة منها مشروع التأمينات على العمال اصحاب المهن , فى لجنة متحدى الاعاقة تواصلنا مع جمعية حبات القلوب الموجوده فى المرج وقدمنلهم بعض الخدمات ومشين فى مشروع للتأمين عليهم , قدمنا كوادر من المرج فى الاتصال السياسى فى الامانة العامة والتدريب والتخطيط , احنا لسه بنبنى حلم عايزين ننتشر , بقدر الامكان بنتواصل مع الناس , وبنعرفهم اتجاهتنا ورويتنا , لو فى اى عمل خيرى او خدمى بنقوم بيه مبنسيسهوش .
6- عند مشاركتكم فى الانتخابات البرلمانية القادمة هل سنرى ا/عاطف فى قوائم الحزب ؟
هو كان فى قوائم اتعملت فعلاً الفتره اللى فاتت وكنا رشحنا 3 اسماء , وبعض الناس طلبو انى ارشح اسمى فى القوائم دى وانا رفضت لسبب بسيط , لو احنا بنبنى حزب لازم يبقى عندك فرصة لكل الكوادر تطلع وده اللى احنا بنحاول نرسخه , مش عشان عاطف المنشاوى بقى امين المرج يبقى فى انتخابات محليات الاقى عاطف المنشاوى فى انتخابات مجلس شعب الاقى عاطف المنشاوى لأ طبعاً فى كوادر محترمة احسن وتفوق عاطف المنشاوى فى امانة المرج وتقدر تخدم وتفيد , فكان فى 3 اسماء مكنش فيهم عاطف المنشاوى , ولو انا عندى القدره انى اخدم فى حاجه زى كده مش انا اللى هحكم الاعضاء فى الامانة هما اللى هحكموا , لكن غير وارد اطلاقاً انى اكون ضمن قوائم المرشحين , انا امين امانة المرج بعمل مع باقى الاعضاء على تأسيس الامانة فاده دور , فى دور تانى فى انتخابات مجلس الشعب , في كوادر فى الامانة لازم تاخد فرصتها , فى دور تانى فى انتخابات محليات فى كوادر محترمه وتفوقنى فكرياً ومجهود ووقت ياخدو فرصتهم , مش هنعمل حكر بقى احنا مشترناش الامانة , فى مساحة مفتوحة لكل الناس .
7- هل هناك تنسيق بينكم وبين الاحزاب الاخرى المتواجدة بالمرج ؟
لا للأسف لسه محصلش اى تواصل , احنا بس قدمنا الدعوة لمعظم الاحزاب بالمرج لحضور افتتاح مقر الامانة والناس تفضلو مشكورين شرفونا ونورونا وكان يوم جميل بوجودهم ولكن مسؤول الاتصال السياسى عندنا كان مشغول فى حملة تمرد , فى الفتره الجايه هنتواصل مع كل القوى , ومعندناش تحفظت على اى حد , واذا كان فى نقد فهو نقد للأداء وليس للأشخاص

حامد محمد : ماذا ستفعلون مع من خسرتوهم من مؤيدين واعضاء بسبب المشاركه في يوم 30يونيو هل الحزب يعلم ماذا يحدث علي الارض هل يعلم ان بلطجية مبارك تروج لتمرد هل يعلم؟
استاذ حامد عضو عندنا فى الامانة وضد المشاركة فى يوم 30يونيو لأن صاحب الدعوة مش احنا وليه مطالب تانية , وفى اعضاء تانى من الامانة مع حملة تمرد , فاده تنوع فكرى موجود , وقرار الحزب يؤخذ بالاغلبية , ويوم الحد فى ندوة لشرح لماذا اخترنا النزول يوم 30ستة , فكل الاعضاء المعترضين على قرار النزول قدمنلهم الدعوة وهيكون فى حد من المكتب السياسى للحزب هيتناقش معاهم , وكل واحد ليه الحرية فى اتخاذ قراره

محمود امام : هل مبادئ الحزب ممثله كما هى فى امانة المرج ؟
لا احد يمتلك الكمال , الكمال لله وحده , بقدر الامكان بنحاول ان احنا نجتهد ونطبق مبادئ الحزب 100% بقدر الامكان

محمد محمود : كيف توصلتم الى قرار المشاركة فى 30/6 ؟ وهل توافقون على حركة تمرد ؟ وماذا سيكون موقفكم اذا لم يسقط مرسى ؟
انا شرحت فى الاسئلة اللى فاتت موقفنا من تمرد واذاى خدنا قرار النزول كاحزب , احنا حزب متعدد الافكار ولكن بتجمعنا انحيازات واضحة اتفقنا كلنا عليها (استقلال القرار الوطنى - الانسان محور عمل الحزب وهو الهدف الاساسى من اى تنمية وليس وسيلة لتحقيقها - احترام الهوية العربية والاسلامية للأمة المعروفة بوسطيتها - ننحاز للحريات الشخصية بصفحة عامة - تحويل الاقتصاد الى اقتصاد منتج يستهدف النهوض بالقطاعين الصناعى والزارعى كأولوية - ننحاز للمساواة والدمج الاجتماعى دون اقصاء اوتهميش لأى فئة اوفصيل - الديمقراطة التشاركية - الانحياز للحقوق الاقتصادية والاجتماعية والعدالة الاجتماعية)

* رسائل *

رسالة لأعضاء حزب مصرالقوية بالمرج
ابدء بنصح نفسى محتاجين نشحن بطاريات اكتر ونشتغل اكتر , بدون اعضاء امانة المرج انا لا اساوى شيئ , هما اللى بيدونا دفعه لقدام , هما اللى بيلهمونا لحل اى مشكلات بتقبلنا , هما دول اللى بأرئهم ومشاركتهم ورؤيتهم الحزب هيبقى قدام ان شاء الله .

رسالة لأعضاء الاحزاب الاخرى بالمرج
انا بناشد كل الاعضاء بما فيهم اعضاء مصر القوية , وانته بتجتهد فى مجال العمل السياسى حط قدام عينك وانته بتاخد اى قرار ان انته بتبتغى رضى الله سبحانه وتعالى فى اتخاذ هذا القرار , لو اخطأنا بنأجر وان اصبنا نأخذ أجرين كما قال الرسول صلى الله عليه وسلم .

رسالة لأهالى الحى غير المنتمين لأحزاب
احنا عندنا مشكلة كبيره اوى وهى اننا ننشر الوعى السياسى , الثورة قامت بدور كبير وخلت الناس كلها تتكلم فى السياسه بس لسه في ناس كتير مشركتش فى السياسة , انك تتكلم فى السياسة حاجه وانك تشارك فيها حاجه تانية , بقول لأهالى الحى انتمئكم لأى كيان سياسى , اى كيان صاحب رواية ومشروع محترم , ده بيتقل من ميزان الحى وبيديله مساحة اكبر فى التأثير فى القرار السياسى , لأن لو عدد قليل اللى بيشارك فى السياسه اكيد هنبقى مهمشين فى خريطة السياسه بتاعت الدولة , فامحتاجين ننشط الوعى السياسى , الناس تشارك مش تتكلم

تحب تضيف حاجه فى اخر الحوار
انا شاكر لحضرتك على الحوار ده ولمجهدكم فى موقع المرج القاهرة ودى حاجه كويسه وشيئ محترم ان انتو بتحولو توصلو رؤية كل الاحزاب للناس .

شاهد ايضاً
اسئل الامين العام لحزب «الحرية والعدالة» بالمرج | أ:معاذ حبلص