امين حزب «الدستور» بالمرج فى حوار مع «المرج القاهرة» يجيب على اسئلة زوار الموقع

فى البداية توجه الاستاذ حمدى مجدى بالشكر لموقع «المرج القاهرة» واصفاً مجهود فريق العمل خلال الفتره الاخيره بالرائع كما ابدى اعجابه بحيادية الموقع فى استفتاء الشهر الماضى عن الاحزاب السياسية بالمرج

ما تقييمك لنتائج تظاهرات ٣٠ يونيو ، اللى بتطالب بسحب الثقة من الرئيس؟     
احنا كاحزب الدستور مشاركين ان شاء الله يوم 30 ستة , احنا مطالبنا كانت معروفه من الاول , وكما تعلم سقف المطالب بيزيد , احنا فى الاول كان لينا عدت مطالب منها تغيير النائب العام وتشكيل حكومة ائتلافية , المطالب لم تنفذ بالتالى سقف المطالب بيعلى , فكان الطبيعى جداً انك تشوف يوم زى يوم 30 ستة , وانا اتوقع واتمنى انى يكون فى حكومة ائتلافية جديده

ما تقييمك لأداء الرئيس فى الأزمة التى تعيشها مصر حاليا؟                         
الازمة لم تدار بشكل جيد بل على العكس الازمات بتزيد يوم عن يوم , والازمات دى بتيجى على كاهل المواطن , فاعشان كده الاصوات ابتدت تعلى كتير اوى , ابتدت حركة زى حركة تمرد تجيب اعداد كتيره اوى , وده مكنش موجود فى الاول , لأن الناس كانت متوقعه بعد الثوره احسن من كده بكتير 

ماهو تقييمك لأداء رئيس الوزراء وحكومته؟                                            
رئيس الوزراء انا مش عارف لحد الان هو دوره ايه ؟ , اللى اعرفه ان رئيس الوزارء أما ان يكون سياسي ناجح اويكون اقتصادى ناجح ,للأسف دور دكتور هشام قنديل سياسياً او اقتصادياً انا مشفتش فيه النجاح , واللى فهمته ان الدكتور هشام قنديل متواجد معانا عشان يحافظ على الموارد المائية وان ده دوره المنوط بيه كارئيس وزراء وأن ده اهم ملف عندنا  , وفوجئنا بعد مابقى رئيس وزارء ان فى مشكلة كبيره هى سد النهضة الاثيوبى اللى حالياً بيتم بنأه , فأنا حتى الان مش فاهم هو دكتور هشام قنديل هو دوره ايه , حتى الوزاره اللى هو جاى منها حصل فيها فشل رهيب

هل ستترشحون لأنتخابات مجلس الشعب القادمة بدائرة المرج ؟                  
احنا ملتزمين بقرارات حزب الدستور وجبهة الانقاذ , اذا حزب الدستور اقر عدم المشاركة , فاأكيد احنا مش هنشارك , حتى الان احنا مقاطعين الانتخابات .

ما هى الأحزاب التى من الممكن أن تتحالفوا معها فى حالة مشاركتكم فى الانتخابات؟  
احزاب الجبهة مثل المصريين الاحرار و الوفد والكرامة والاحزاب المدنية اللى موجوده حالياً , معندناش اى مشكلة فى التحالف مع الاحزاب المدنية , ولكن انا استبعد ان احنا نشارك , ده توقع شخصى .

فى حالة المشاركة , هل تتوقع حصول حزب الدستور على نسبة مؤثرة في الانتخابات القادمة؟
واللهى لو الانتخابات هتم بنزاهه وحياديه اتوقع نسبة كبيره جداً

          * اسئلة زوار الموقع *         

غير معروف : اين تواجدكم بالشارع ليس لكم اى تواجد بين اهالى المرج , ليه بتكتفو بحملات تمرد وغيرها ولا تلتفتو للمواطن المرجاوى ؟    
اولاً احنا شركنا المواطنين فى المرج فى معظم المناسبات سواء الدينية او الاجتماعية , شركنا فى مناسبة المولد النبوى الشريف وقمنا بتوزيع الحلويات , كنا متواجدين فى عيد القيامة المجيد , كنا متواجدين فى عيد العمال , كنا متواجدين فى يوم اليتيم وعملنا يوم رائع جداً تحدث عنه الجميع , كنا موجودين فى العيد الاضحى , كنا موجودين فى معظم المناسبات , الى جانب تواجدنا فى حملة تمرد بشكل قوى جداً , ولكن فضلنا ان احنا ننزل تحت اسم تمرد مننزلش بأسم الدستور , عشان نحافظ على اسم حركة تمرد , كنا موجودين فى الاستفتاء على الدستور وقدرنا نغير وجهة نظر ناس كتير جداً , ساعدنا فى انتشار الكتلة المدنية فى المرج بشكل ملحوظ , لو هنقول ان احنا فى الانتخابات البرلمانية والرئاسية الكتلة المدنية كانت قليلة , لما نزل حزب الدستور زادت الرقعة المدنية فى المرج , كنا متواجدين ايضاً فى برنامج اسمه مشكلتك ايه ؟ كنا بننزل لكل الحرفيين وكل الناس فى كل مكان فى المرج عشان نقدر نعرف هو ايه مشكلته هل هى مشكلته مع الاحياء , هل هى مشكلته مع الكهرباء , هل هى مشكلته مع شركة المياه , فاده كان مهم جداً كان لازم نعرف الاول المشكلة عشان نقدر نحلها .

غير معروف : ليه مكنش ليكو اى دور فى مشكلة قصر نعمة ؟        
موضوع قصر نعمة مبدئياً فى ناس كتير جداً من حزب الدستور شاركت فيه بشكل شخصى مش بصفه حزبية  , واحنا كا حزب الدستور متضامنين جداً مع مشكلة قصر نعمة , لكن الفكرة ان احنا بنرفض اى مزايده , انا ارفض ان انا اتواجد فى مكان وافضل ازايد وغيرى يزايد ونشوف مين فينا اللى هيقدر يوصل اكتر , لا انا هشارك بشكل شخصى معنديش اى مشكلة لكن بصفة حزبية انا مبقبلش اى مزايدات

غير معروف : ايه هى خططكم فى المرج للتعامل مع اهالى الحى وازى هتكسبو اهالى المرج لصالحكم ؟   
احنا كاحزب الدستور اللى بيميزنا عن بقية الاحزاب ان احنا حزب عنده المصداقية اعلى , يعنى مش حزب يوعد بشيئ ويخلف , فا انهارده انا لما عملت حملة اسمها مشكلتك ايه  , انا كنت بعالج حاجه مهمه اوى , اى مشكلة فى الدنيا ليها حلين , الحل الاول هو حل مؤقت والحل التانى هو الحل الجزرى , انا انهارده مش شغال على الحل المؤقت بمنتهى الصراحة , انا شغال على الحل الجزرى , وعشان اعرف احل المشكلة لازم اعرف الاول ايه المشكلة وبالفعل عرفت ايه المشكلة , الحملة التانية اللى هندشنها ان شاء الله اسمها اعرف حقك , لازم المواطن المرجاوى يعرف حقه فين , هنبتدى نتواجد فى وسطهم وهنعرف كل الموطن انته حقك فان مع شركة الكهرباء  وحقك فان مع شركة الماء وحقك فان مع الأحياء وتعاقدك ده بيقول ايه وايه ولازم نفسر بنوده كلها ونفهم المواطن المرجاوى فين حقوقه علشان نقدر نساعده ،بعد ميفهم حقوقه فين بعد كده هندشن حملة (عايز حقى) ودى الحملة الأهم , انهاردة أنا كحزب أنا مش جهة تنفيذية لازم الكل يعرف ان حزب الدستور ليس جهة تنفيذية ودى عايز احط تحتيها 100 خط احنا حزب سياسى وليس جمعية خيرية أو جهة تنفيذية احنا كل دورنا ان احنا نوجه المواطن المرجاوى توجيه سياسى صحيح والتوجيه السياسى الصحيح بيتم ان احنا لازم أولا نعرف ايه مشكلته , ثانيا نعرفه حقه فين , ثالثا نخليه هو اللى يطالب بحقه ونقف وراه ونسانده .

عبد الرحمن حشيش : كنت عاوز اعرف ماهى انجازات الحزب منذ ان قامت الثورة، ويا ريت تكون انجازات بالمعنى الحرفى للكلمة ؟  
أولا احنا حزب وليد فحضور حزب الدستور فى الأرض وتواجده فى الشارع بهذه القوة ده من أكبر الأنجازات للحزب رغم عدم مرور عام على تأسيسهه حتى الأن ، تانى حاجة احنا قدمنا كحزب الدستور مشروع اقتصادى كامل مقدم من الدكتور محمد البرادعى رئيس الحزب ، المشروع ده من حوالى 124 صفحة وده بيعالج أزماتنا الراهنة , ازاى نخرج من الأزمة اللى احنا موجودين فيها ولكن للأسف لم يلتفت أحد لهذا المشروع من الجهة التنفيذية , كمان الحزب كان ليه دور واضح لحث الناس على مقاطعة الأستفتاء على الدستور أو التصويت بلا أو رفضه لما به من عوار دستورى على سبيل المثال وليس الحصر تصويت الجيش والشرطة فى الأنتخبات احنا بعد مالناس وضعت الدستور اكتشفت ان دلوقتى من حق الجيش والشرطة ان هما يصوتوا , مع انهم اساسا ميعلموش الكلام ده كله واحنا نبهنا كتير اوى ان فى الدستور مواد متفجرة , واذا مكنش اللى هيحط الدستور خبير دستورى وفقيه دستورى هتبقى كارثة كبيرة جدا والكوارث بتنتج واحده ورى الثانية , نبتدى نشوف كوارث الدستور اللى الناس صوتت عليه بنعم ، الحاجة الثانية برده من ضمن الحاجات اللى فيها عوار دستورى ونبهنا عليها جداً هو ربط الأجور بالأنتاج احنا كنا بنطلب بربط الأجور بغلاء الأسعار وده اللى ابتدى يظهر دلوقتى، دلوقتى الأسعار بتغلى وهو هو الداخل للمواطن فدى هتبقى مشكلة كبيرة جدا على المدى البعيد ’ الحاجة الثالثة حزب الدستور عمل حراك فى الشارع المصرى وحث المواطنين على المشاركة السياسية الايجابية يعنى مننكرش ان النهاردة كان فى سلبية سياسية كبيرة جدا لكن حزب الدستور لمانزل وتواجد فى الشارع ابتدى يبقى فى ايجابية أكثر وابتدت الناس تتجاوب معانا وابتدت الناس تتكلم سياسيا وابتدت تشارك وده كان دور مهم جداً لحزب الدستور , رابع حاجة حزب الدستور كان من المؤسسين بقوة لحركة تمرد ، حزب الدستور دعم حركة تمرد بشكل قوى جداً 

محمود محمد : لماذا لا يوجد لكم اى رأى فى مشاكل حى المرج والجلوس مع رئيس الحى للعمل على حل تلك المشاكل بحيث أن هناك مشاكل كثيرة فى هذا الحى مش بنلاقى اى دور للأحزاب السياسية على العمل لحل تلك المشاكل؟  
ده هيتم لكن احنا بنحل المشكلة جذريا مش بنحلها مؤقتا وان احنا عملنا (مشكلتك ايه ) الاول وعرفنا مشاكل الناس ايه وفى ناس كثيرة جدا ليها مشاكل مع الأحياء فعلا والمفروض بعد كدة الناس دى هتقعد مع رئيس الحى وهنمسك قوانين المحليات وهنبتدى نتعامل معها ونعرف حق المواطن فين وبعد كدة نبتدى نطالب بحقه .

محمد حشيش : ما الفرق بين سياسة الحزب والأحزاب الأخرى تجاه البلد والنظام الحاكم بعد الثورة ؟   
حزبنا يتميز بمصداقية وشفافية فى كل قراراته , المصداقية دى هي اللى مديه نوع من الطمأنينة لدى الناس لأن كان فى قبل كدة أحزاب بتقول وعود ومكنتش بتنفذ , فاحنا لم نلجأ أبدا لذالك والدليل ان لو نزلت اتكلمت مع أى مواطن مصرى بصفة عامة عن حزب الدستور مش هيلاقى وعود مننا متنفذتش أو طرحنا وعود ومعملنهاش لأن أنا حتى وعودى قليلة جدا لأن أنا بلتزم بيها فعلاً .

عبد الرحمن حشيش :  يا ريت توضيح من أستاذ مجدى عما يميز حزب الدستور عن التيار الشعبى ولو مفيش فرق لما لم يتم دمج الأثنين ليكونا حزباً واحداً ؟  
أولا التيار الشعبى هو حركة شعبية وليس حزب لكن فى أعضاء كثيرة جدا من حزب الدستور متواجدين فى التيار الشعبى واحنا والتيار الشعبى تقريباً فكرنا متقارب جداً من بعض , ومتواجدين مع بعض وفى ترابط مبينا , وحتى احنا كمان متواجدين فى جبهة الأنقاذ , وأما بالنسبة للأندماج فهناك فرق هو لو كان حزب كان ممكن الحزبين يندمجوا لكن هى حركة سياسية واحنا كحزب الدستور بنحترمها جداً . 

أحمد العماوى : وما هو موقفه من الأحزاب الوطنية والليبرالية والأسلامية؟
مبدأيا احنا موقفنا واحد من الأحزاب كلها لكن مفيش حاجة اسمها أحزاب اسلامية لأن أولاً لايوجد فى الأسلام ما يسمى بالأحزاب الأسلامية وكلنا نعلم الشيخ ابن عثيميين قال : اذا كثرت الأحزاب فى الأمة فلا تنتمى الى حزب ، ورأى شيخنا الجليل الشعراوى (رحمة الله عليه) أرفض أن يتلخص دينى فى صندوق انتخابات ،وتمنى شيخنا أن يصل الدين الى أهل السياسة وليس أهل الدين الى السياسة , بالنسبلنا الاحزاب الاسلامية زيها زى الاحزاب التانية علقتنا بيهم كأشخاص علاقة جيده ممكن تربطنى صداقات مع اشخاص بينتمو ليها مفيش اى مشكلة , لكن احنا مختلفين فى توجهتنا الفكرية والسياسية .

أحمد العماوى : كيف سيتعامل الحزب مع الجمعيات الاهلية والخيرية والاجتماعية وما هو الدور الذى يستطيع ان يوفره بالنسبه لهذه الجمعيات فى سبيل العمل العام ؟
احنا عندنا فالحزب فى لجنة للتنمية المجتمعية دورها الاساسي هو عمل اتفاقيات لمساعدت الجمعيات الخيرية فى عملها والسعى لتوفير مناخ مناسب لعمل هذه الجمعيات ودعمهم بكل قوة , فأحنا بالنسبلنا الجمعيات دى ليها دور مهم جداً , واحنا كاحزب الدستور شيفين كواجب علينا لازم ندعمها ونحاول قدر المستطاع نزلل العقبات امامها , علشان خاطر الجمعيات دى بتكمل دورنا فى المجتمع لتنميته .

احمد المسلم : حزب الدستور بالمرج معظم اعضائه من نصارى المرج ..امواله تاتى من كنيسه محمد نجيب .
اولاً انا اسمى حمدى مجدى محمد , الحمد لله مسلم , وبقيت الاعضاء فى الحزب تقريباً مسلمين , كل اللى بيتواجد معانا 3 اقباط فى الحزب , وانا اتمنى ان يبقى اكتر من كده بكتير , واتمنى الاقباط ينضمولنا , احنا فى العمل السياسي مفيش حاجه اسمها مسلم وقبطى , احنا اخوات فى الوطن وشركاء , وهذا الكلام عار على اللى بيقوله , واللى لازم يعرفه بالنسبة لأمولنا تأتى من الكنائس احنا لحد دلوقتى معندناش مقر والحزب بقاله اكتر من سنة , بس ان شاء الله هيتم توفيره قريب , وليس لنا مصدر تمويل احنا كأعضاء بنمول الحزب من جيوبنا .

احمد المسلم : اعضاء حزب الدستور من الشابات .......... حتى يلعبن على شباب المنطقه للدخول فى الحزب , هدفهم الرئيسى هدم الاسلام وقيمه ونشر الرزيله بين صفوف المجتمع , لا دور له سوى الكلام والاثارة , المسلمون الموجودون به اما ياخذون اموال او فاتحين محلات موبنيل تبع نجيب ساويرس فطبعا بيديهم امتيازات ودليل ذلك عد ليا كام محل موبنيل صاحبهم مسلم وكام نصرانى ,من الاخر هو حزب نصرانى يهودى هليكوست , واى واحد اشوفه فى الشارع معلق يفطه حزب الدستور ها اديله .......
كل الكلام ده افتراء وكذب , واذا كان حابب يتواجد مبينا ويشوف احنا بنعمل , ويشوف كل حاجه احنا معندناش مشكلة , زى ماقلتلك احنا حزب بيتميز بمصداقية وشفافية , ومعندناش اى مشكلة نقول اى حاجه .

*****

ما الذى يضيفه حزب الدستور للحياة السياسية ؟                                    
حزب الدستور اثرى الحياة السياسية , حزب الدستور هو حزب مدنى شارك بقوى من بعد الثوره حتى الان , وابتدى ينتشر فى المجتمع كاكل , وابتدى اسمه يبقى متواجد فى كل بيت انهارده , وعمل حرك سياسي غير عادى فى الشارع , وده اللى كنا بنأمله ونتوقعه من حزب الدستور , وان شاء الله نتوقع المزيد من النجاح لحزب الدستور .

كيف ترى وضع المرأة المستقبلى فى مصر؟                                          
احنا دلوقتى مش شيفين الوضع المستقبلى لمصر ككل بصراحة , احنا بنتمنى ان المرأة يكون ليها دور اكبر فى المجتمع المصرى , وانها تشارك بكل قوة فى الحياة السياسية لأن دورها مطلوب بالفعل سواء على المستوى السياسي او المجتمعى او الثقافى لابد من مشاركة المرأة فى كل المجالات.

كيف ستواجهون التيارات الدينية فى الانتخابات القدمة؟                          
انا كامواطن بمارس سياسة طلاما انا فى حزب سياسي وانا مرجعى الازهر الشريف , بغض النظر عن اى شيئ انا مش هواجه التيارات الدينية بفتاوى دينية انا بمارس سياسة , وافتكر دلوقتى ان المواطن بقى قادر يفرق جداً بين اللى بيمارس سياسة وبين اللى بيمارس شعارات سياسية .

ما مدى إمكانية التعايش بين تيار الإسلام السياسى والتيار المدنى؟          
 اذا تم تصالح وطنى للجميع , ولكن اعتقد الان الامال ضعيفه  , ولا اعترض على وجود تيار الاسلام السياسي بس يمارس سياسة لا يمارس شعائر دينية داخل السياسة لأن ده خطر جداً , انا مش عايز اقلك كمية الالحاد زادت قد ايه فى الفتره اللى فاتت بسبب ان فى ناس معندهاش ثقة فى رجال الدين اللى بيمارسو سياسية , دا بعض رجال الدين بتكفر بعض , احنا فى كارثه .

ما موقف الحزب من تبيق الشريعة الاسلامية؟                                   
احنا مع تطبيق الشريعة ومرجعنا هو الازهر الشريف , واحنا كلنا بنثق فيه , وشيفين انه قادر على ان يقود البلاد الى بر الامان ان شاء الله , لأن اللى بيحصل دلوقتى ان فى ناس بتحاول تهمش دور الازهر الشريف وبتحاول تقلل من دوره وتقضى عليه عشان يبقى هما مرجعنا الدينى وده مرفوض تماماً , احنا كل اللى عايزين ان مرجعيتنا تبقى الازهر فقط وكلنا نرجع ليه .

هل تتوقع أن يحصد الحرية والعدالة نفس الأصوات التى حازها فى الانتخابات الماضية؟   
 فى ظل النائب العام اللى موجود وفى ظل الحكومة اللى موجوده وفى ظل عدم مشركتنا ممكن ياخد اكتر من كده كمان , احنا معندناش مشكلة اساساً , كده كده احنا مش فارق معانا , واذا اجريت الانتخابات فى ظل الوضح الحالى هيبقى فيه شبهة تزوير .

كتبت يوم 1 اكتوبر 2011 على حسابك على فيس بوك ( رجل احترمه كل المصريين سلفيين واخوان وليبراليين وعلمانيين .... حازم صلاح ابو اسماعيل ) , بعد مرور اكتر من سنة هل لسه بتحترمه  ؟   
لا , للأسف الشديد , الشيخ حازم ابواسماعيل كان فى الاول ليه مواقف انا شايف انه كان يميل اكتر الى الثورة , وانا شفته بنفسى فى محمد محمود كان متواجد معانا , لكن فى نفس اليوم فى محمد محمود الشيخ حازم مبتش معانا فى الميدان , جاله تليفون ومشى , مواقف الشيخ حازم دلوقتى كلها فى اتجاه واحد , الشيخ حازم انهارده لما ترشح لرئاسة الجمهورية قال بمنتهى الصراحة ان ولدته مش امريكية , وانا شخصياً دخلت على مواقع وتأكدت تماماً ان ولدته موجوده فى امريكا ومن حقها التصويت فى الانتخابات , وانا لما لقيت الشيخ حازم غير صادق فى المسألة دى تغيرت وجهة نظرى تماماً , ده بخلاف مشكلته فى العباسية , ان كان المفروض يتواجد مع الناس ومكنش متواجد , والعديد من المشاكل ديماً بنلاقى الشيخ حازم بيقول انا هبقى موجود ويسيب الناس ويمشى , فده اللى خلانى اغير وجه نظرى فيه تماماً .

  * الاحزاب السياسية بالمرج *  

ايه تقيمك لأداء الاحزاب السياسية بالمرج ؟                                        
ارفض التعليق على اى حزب اخر .

 * رسائل * 

رسالة لأعضاء حزب الدستور بالمرج .                                           
افتخر بوجودى معكم , وانتم فعلاً رائعون , واتمنى ان نسير على نفس الدرب , ومن نجاح لنجاح ان شاء الله

رسالة لأعضاء الاحزاب الاخرى بالمرج .                                         
اتمنى وجودكم , لان وجودكم هو فى الاخر خدمة للمواطن المرجاوى , بغض النظر مين اللى هيقدم الخدمة , المهم ان احنا نخدم المواطن .

أهالى الحى غير المنتمين لأحزاب .                                                 
اتمنى منكم المشاركة الحزبية او التواجد فى الجمعيات الشرعية اوما الى ذالك , حتى نستطيع ان نرى مجتمع افضل .

****

تحب تضيف حاجه فى اخر الحوار .                                                
احب اضيف , اولاً الاستفتاء اللى اتعمل على موقعكم انا بحب اوجه الشكر لدكتور امير الفقى وللمكتب التنفيذى اللى كان قائم قبل وجودى واللى النجاح فى الاستفتاء ده كان نجحهم هما مش نجحنا احنا , لأن ده كان مجهودهم فى الفتره اللى فاتت , واحب اقلهم انتو فعلاً اثبتو لناس ان انتو مكتب تنفيذى اكتر من رائع , وان شاء الله انا هبتدى منين مانتو انتهيتو , واعاهدكم ان شاء الله بأذن الله انى مش هخزلكم .

شاهد ايضاً     
اسئل الامين العام لحزب «الحرية والعدالة» بالمرج | أ:معاذ حبلص